ഭൂമിശാസ്ത്രം
പത്തനംതിട്ട ജില്ലയിലെ റാന്നി പെരുനാട് ഗ്രാമ പഞ്ചായത്ത് പ്രകൃതി സൗന്ദര്യത്താലും സമ്പന്നമായ ജൈവ വൈവിധ്യത്താലും ശ്രദ്ധേയമായ ഒരു ഗ്രാമ പഞ്ചായത്താണ്. പത്തനംതിട്ട ജില്ലയിലെ റാന്നി താലൂക്കില് സ്ഥിതി ചെയ്യുന്ന ഈ പഞ്ചായത്ത് കിഴക്കന് മലനിരകളുടെയും സമൃദ്ധമായ വനപ്രദേശങ്ങളുടെയും ഇടയിലാണ് വ്യാപിച്ചു കിടക്കുന്നത്. സംസ്ഥാന അതിര്ത്തിയോട് ചേര്ന്നുള്ള ഈ പ്രദേശം പശ്ചിമഘട്ടത്തിന്റെ പ്രകൃതിസൗന്ദര്യം നിറഞ്ഞ ഭൂപ്രദേശങ്ങളിലൊന്നായി അറിയപ്പെടുന്നു. പഞ്ചായത്തിന്റെ ഭൂരിഭാഗം പ്രദേശങ്ങളും മലയോര മേഖലയായതിനാല് ഇവിടെ ശീതളമായ കാലാവസ്ഥയും സമൃദ്ധമായ മഴയും അനുഭവപ്പെടുന്നു. റാന്നി പെരുനാട് പഞ്ചായത്തില് കൃഷിയാണ് പ്രധാന ഉപജീവന മാര്ഗം. ധാരാളം ചെറുനദികളും തോടുകളും പ്രദേശത്തിന്റെ ജലസമ്പത്തിനെ സമൃദ്ധമാക്കുന്നു. വനമേഖലകള്, കുന്നുകള്, താഴ്വരകള്, എന്നിവ പഞ്ചായത്തിന്റെ ഭൗമശാസ്ത്ര സവിശേഷതകളെ കൂടുതല് മനോഹരമാക്കുന്നു. പഞ്ചായത്തിന്റെ സിംഹഭാഗവും പെരിയാർ ടൈഗർ റിസർവ്വ് ഫോറസ്റ്റിന്റെ ഭാഗമായുള്ള ശബരിമല വനങ്ങളാല് സംമ്പുഷ്ടമാണ്. ഗ്രാമപഞ്ചായത്തിന്റെ ആകെയുള്ള 16 വാർഡുകളില് 11 വാർഡുകള് പെരുനാട് മേഖലയിലും 5 വാർഡുകള് പമ്പാവാലി മേഖലയിലും സ്ഥിതി ചെയ്യുന്നു.